કાર્યવાહી: નગરપતિને થપ્પડ મારનાર સુખપરના શખ્સની અટકાયત – InfowayTechnologies

નાગોર રોડ પર પાલિકાની ડમ્પીંગ સાઈટ પર બે ગાયોના મોત મામલે બુધવારે રજૂઆત સમયે એક ગૌસેવકે નગરપતિને લાફો માર્યો હતો.જોકે બનાવ બાદ પ્રમુખે ફરિયાદ ન નોધાવતા આખરે પોલીસે સીઆરપીસી કલમ હેઠળ સુલેહશાંતિ જાળવી રાખવા સુખપરના શખ્સની અટકાયત કરી હતી.

ગત બુધવારે શહેરના નગરપતિ ઘનશ્યામ ઠક્કરને સુખપરના મહિપતસિંહ સોઢા ઉર્ફે લાલા એ નગરપાલિકા કચેરીમાં જ ગાલ પર તમાચો ઝીંકી દીધો હતો.નાગોર રોડ પર આવેલ નગરપાલિકાની ડમ્પીંગ સાઈટ પર વીજ આંચકો લાગવાના કારણે બે ગાયોના મોત થયા હતા.જેની રજૂઆત કરવા ગૌસેવકો નગરપતિ પાસે આવ્યા હતા.એ દરમિયાન નગરપતિને થપ્પડ માર્યાની ઘટના બની હતી.શહેરમા ભારે ચર્ચાનું કેન્દ્ર બનેલી આ ઘટનામાં થપ્પડ મારનાર શખ્સ વિરુદ્ધ કોઈ ફરિયાદ ન નોધાતા આખરે શહેર એ ડીવીઝન પોલીસે સીઆરપીસી કલમ હેઠળ જાહેર સુલેહ શાંતિના ભંગ સબબ સુખપરના શખ્સ સામે અટકાયતી પગલા ભર્યા હતા.આ ઘટનામાં જીલ્લાના દરેક તાલુકામાં નગરપાલિકા પ્રમુખની તરફેણમાં આવેદન પત્રો પણ અપાયા હતા.