આર્યન મોદીની હત્યામાં બહાર આવ્યું અર્બુદા સેનાનું કનેક્શન: ‘કોઈએ દગો કરી, ઢોર માર મારી ને મારો નગ્ન વીડિયો ઉતાર્યો’,એક શંકાને કારણે પરિવારે જુવાનજોધ દીકરો ગુમાવ્યો – InfowayTechnologies

‘મારાભાઈને ન્યાય આપો, અમે કોઈ દિવસ કોઈને નડ્યા નહીં. મારા ભઈને મારી નાંખ્યો આ લોકોએ, મને તો પાછો નહીં મળે ને. આર્યનના અપરાધીને પકડજો સાહેબ. આર્યનનું શરીર જોઈ આવો સાહેબ… આદર્શ કોલેજમાંથી છૂટ્યો અને મારતા મારતા કિડનેપ કરી અજાણ્યા સ્થળે માર માર્યા પછી પોઇઝન પીવડાવ્યું. ઘરે ઉલટીઓ કરતા તાત્કાલિક દવાખાને લઈ ગયા અને રાત્રે 2 વાગ્યે તેનું મૃત્યુ થઈ ગયું.’ આ શબ્દો છે પાલનપુરમાં જેની 16 ફેબ્રુઆરીના રોજ હત્યા કરવામાં આવી તે આર્યન મોદીની બહેનના.

આજે પણ એક છોકરો અને છોકરી વાતચીત કરે તો શંકાની નજરે જોવામાં આવે છે, માત્ર એટલું જ નહીં તેમના વચ્ચે પ્રેમ સંબંધો હોવાની શંકા પણ રાખવામાં આવે છે. જો કે આ સ્થિતિ તો બે દાયકા કરતા પણ વધુ સમયથી બદલાઈ રહી હોવાનું લાગી રહ્યું હતું. પરંતુ હજુ પણ આ પ્રકારના માનસિક બીમાર લોકો સમાજમાં જીવે છે અને આ શંકાના આધારે જ કેટલાય યુવક અને યુવતીઓના જીવન બરબાદ કરી રહ્યા છે. તાજેતરમાં પાલનપુરમાં એક આવો જ કિસ્સો સામે આવ્યો છે. પોતાના સમાજની છોકરી સાથે પ્રેમસંબંધો હોવાની શંકા રાખી 16 ફેબ્રુઆરીના રોજ આર્યન મોદીની હત્યા કરી દેવામાં આવી હતી. આર્યન મોદી કેસ મીડિયામાં ભલે જોઇએ એટલો ગાજ્યો નથી, પણ આ કેસ આપણા સમાજમાં ચાલતી જ્ઞાતિવાદી માનસિકતાને ઉઘાડી પાડે છે. માત્ર એટલું જ નહીં, પાલનપુર પૂર્વ પોલીસ સ્ટેશનના પીઆઇ જેપી ગોસાઈને આરોપીઓના નામ ન જાહેર કરવા બદલ સસ્પેન્ડ કરવા પડ્યા હતા. પોલીસ જ જો ગુનેગારોનો સાથ આપે તો પછી સામાન્ય માણસને ન્યાય કોની પાસે માગવો?

સાયન્સમાં ગ્રેજ્યુએશન કરતો આર્યન ભણવામાં અવ્વલ હતો
આર્યન મોદી પાલનપુરની આદર્શ સંકુલમાં B.SC.કરતો હતો. આ યુવાન ભણવામાં ખૂબ હોંશિયાર હતો અને તેના ક્લાસમેટ પણ અભ્યાસ બાબતે તેની મદદ લેતા હતા. આદર્શ સંકુલમાં કુલ 13 છોકરા અને 70 છોકરીઓ મળી 83 વિદ્યાર્થી અભ્યાસ કરતા હતા. આ 70 છોકરીઓમાંની એક છોકરી અસાઇનમેન્ટને લઈ આર્યનના સંપર્કમાં હતી. બન્ને વચ્ચે બસ આટલા જ સંબંધો હતા. પરંતુ અર્બુદા સેનાના હોદ્દેદારો સહિત કુલ 13 શખ્સોએ પોતાના સમાજની છોકરી સાથે પ્રેમ સંબંધો હોવાની શંકા રાખી તેને બેરહેમી પૂર્વક માર માર્યો હતો. ત્યાર બાદ આર્યન મોદીનું સારવાર દરમિયાન મોત થયું હતું.

હૈયાફાટ રુદન કરી રહેલી આર્યન મોદીની બહેન અને મૃતક આર્યન.

સમગ્ર ઉત્તર ગુજરાતમાં ચર્ચાસ્પદ બનેલા આર્યન મોદી કેસમાં ખરેખરે શું બન્યું? આર્યનની હત્યા પાછળ શું ખરેખર પ્રેમપ્રકરણ જવાબદાર હતું?તેની હત્યાનો પ્લાન કેવી રીતે ઘડ્યો? હત્યાનો પ્લાન ઘડ્યા બાદ તેને કેવી રીતે અંજામ આપ્યો? આ તમામ બાબતો અંગે જાણવા દિવ્ય ભાસ્કરે પાલનપુર તાલુકા PI દેસાઈ અને આર્યન મોદીના મોટા પપ્પા રોહિત મોદી સાથે વાતચીત કરી હતી.

‘સહેજ પણ દયા ન કરી, ગુપ્તાંગ સહિતના ભાગે નિર્દયતાથી માર્યો’
દિવ્ય ભાસ્કર સાથેની વાતચીતમાં આર્યન મોદીના મોટા પપ્પા રોહિત મોદીએ પરિવાર અને આર્યન અંગે વાત કરતા જણાવ્યું કે, મારા ભાઈ ભરતભાઈ મોદીની પાલનપુરમાં ફરસાણની દુકાન છે. તેમનો મોટો દીકરો આર્યન, નાના દીકરા તેમજ પત્ની સાથે પાલનપુરમાં આવેલી રાજકમલ સોસાયટીમાં રહે છે. આર્યન ભણવામાં ખૂબ જ હોંશિયાર હતો, આ ઉપરાંત અન્ય એક્ટિવિટીમાં પણ તે આગળ રહેતો હતો. તે નિઃસ્વાર્થ ભાવે બધી એક્ટિવિટીમાં ભાગ લેતો એના મનમાં એવા કોઈ ખરાબ વિચારો નહોતા, બધા છોકરા-છોકરીઓ એના ચોપડા લઈ જાય અને આપી જાય. આ જ બાબતે એ વાતચીત કરતો ભણવા સિવાય બીજી કોઈ એની વાતચીત જ ના હોય, અમને આઘાત એટલા માટે લાગ્યો કારણ કે એનો કોઈ વાંક અને યોગ્ય કારણ વગર આ છોકરાને નિર્દયતાથી માર મારવામાં આવ્યો, તેના પર સહેજ પણ દયા ન કરી, એક મિનિટનો વિચાર નથી કર્યો. એના ગુપ્તાંગથી લઈને તમામ ભાગે નિર્દયતાથી માર મારવામાં આવ્યો. વાલી તરીકે અમને જાણ પણ કરી શક્યા હોત કે આવું છે, પરંતુ અમને કોઈપણ જાણ કર્યા વગર અમારા છોકરાને પતાવી દીધો. હું ઘરમાં મોટો છું. હૃદય પર પથ્થર રાખીને વાત કરું છું. હકીકતમાં મારા ઘરની પરિસ્થિતિ બહુ ખરાબ છે.

આર્યન મોદી અને તેના મોટા પપ્પા રોહિત મોદી.

‘લોખંડની ખીલાસરીથી માર માર્યો, ઘરના આંગણે પહોંચતા જ ઢળી પડ્યો’
જે દિવસે ઘટના બની તે દિવસની ઘટના વર્ણવતા રોહિત મોદીએ દિવ્ય ભાસ્કરને કહ્યું કે આર્યન આદર્શ વિદ્યા સંકુલ જે તેના ઘરથી અડધો કિલોમીટર જેટલી દૂર આવેલી છે, તે કોલેજમાં B.SCના પહેલા વર્ષમાં અભ્યાસ કરતો હતો. તે દિવસે પણ તે તેના કોલેજના સમય પ્રમાણે 11:00 વાગ્યે કોલેજ જવા ઘરેથી નીકળ્યો હતો અને કોલેજ પહોંચ્યો હતો. 12 વાગ્યાના સમયની આસપાસ તેના પર એક ફોન આવ્યો અને પૂછ્યું કે, ‘તારું નામ આર્યન છે? તારા પપ્પા ભરતભાઈ બોલાવે છે’ તેમ કહીને એક અજાણ્યા વ્યક્તિએ ફોન કર્યો હતો. જેથી આર્યન અને તેના મિત્ર બંને સાથે કોલેજના ગેટ આગળ ગયા હતા. આર્યન અને તેના મિત્રોને આ અજાણ્યા વ્યક્તિએ કારમાં બેસાડીને અજ્ઞાત જગ્યાએ લઈ ગયા હતા, જ્યાં તેમને પંચ અને ખિલાસરીથી માર માર્યો હતો અને તેને કંઈક પીવડાવી દીધું હતું. ત્યારબાદ આરોપીએ તેને ગાડીમાં પાછો તેની કોલેજ આગળ ઉતારી દીધો હતો. મારમારનારા લોકોને એવું હતું કે આર્યન ઘરે નહીં પહોંચે, પરંતુ આર્યન તેના કોલેજના ગેટથી એક્ટીવા લઈને ઘરે પહોંચ્યો હતો અને ઘરના આંગણામાં પહોંચતા જ તે ઢળી પડ્યો. તેણે કહ્યું કે ‘કોઈ અજાણ્યા વ્યક્તિએ મને દગો કરી, ઢોર માર માર્યો છે. મારો નગ્ન વિડીયો ઉતાર્યો છે’ જોકે આ વાતચીત સાંભળતાની સાથે જ અમે તેને તાત્કાલિક હોસ્પિટલમાં લઈને પહોંચ્યા હોસ્પિટલમાં જતા જતા રસ્તામાં જ તેને ઊલટીઓ શરૂ થઈ ગઈ. ત્યારબાદ અમે તેને પાલનપુર હોસ્પિટલમાં ICUમાં એડમિટ કર્યો.

દિવ્ય ભાસ્કરે સમગ્ર કેસની તપાસ કરી રહેલા પાલનપુર તાલુકા PI એ.વી. દેસાઈ સાથે વાતચીત કરી હતી. જેમાં આર્યનને કોણ અને ક્યાંથી લઈ ગયું હતું આર્યનની હત્યા માટે ક્યાં પ્લાનિંગ કરવામાં આવ્યું હતું અને ઉત્તર ગુજરાતના કયા સંગઠનના કેટલા હોદ્દેદારનો હાથ હતો તે બાબતે વાત કરી હતી.

પિયૂષ નામનો શખ્સ આર્યન પર વોચ રાખતો
પાલનપુર તાલુકા PI એ.વી. દેસાઈએ દિવ્ય ભાસ્કર સાથે વાતચીતમાં જણાવ્યું કે, બનાસકાંઠા પાસેના પાલનપુરમાં આવેલા જગાણા ગામના જયેશ નામના વ્યક્તિને તેના જ ગામમાં રહેતી એક ચૌધરી સમાજની યુવતીને તેની પાલનપુર કોલેજમાં ભણતા એક યુવક સાથે પ્રેમ સંબંધ હોવાની માહિતી મળી હતી. પોતે અર્બુદા સેનાનો પાલનપુરનો પ્રમુખ હોવાથી આ મામલે રસ દાખવ્યો અને તેણે તેના જ ગામમાં રહેતા મિત્ર પીયૂષને આ બાબતે તપાસ કરવા કહ્યું હતું. જોકે ત્યારબાદ આ પિયૂષ નામનો શખ્સ આર્યન પર વોચ રાખતો હતો અને તેણે જયેશને એવી માહિતી આપી કે આર્યન મોદી નામના છોકરો જે તેની સાથે અભ્યાસ કરે છે તેની સાથે વાત કરે છે. જેથી તેમણે આ વાત અર્બુદા સેનાના વિપુલ ચૌધરીને કરી હતી. ત્યાર બાદ વિપુલ ચૌધરી અને આશિષ બન્ને ભેગા મળીને આર્યન પાલનપુરની જે કોલેજમાં ભણતો હતો, ત્યાં તપાસ કરી હતી કે તે આ કોલેજમાં ભણે છે કે કેમ. કારમાં બેસાડીને આર્યનનું અપહરણ કરવામાં આવ્યું.

આર્યન ભણવામાં ખૂબ હોશિયાર હોવાથી અન્ય વિદ્યાર્થીઓ તેની પાસેથી અસાઇનમેન્ટ લેતા હતા.

‘બોલ તારે જગાણાની આ છોકરી સાથે શું છે? ’
પાલનપુર તાલુકા PIએ વધુમાં જણાવ્યું કે, આ સમગ્ર તપાસ કર્યા બાદ અને આર્યનનો મોબાઈલ નંબર મેળવીને વિપુલ તેની કાર લઈને બીજા દિવસે કોલેજ પહોંચ્યો હતો. જ્યાં તે કોલેજ બહાર કાર પાર્ક કરીને ડમી કાર્ડમાંથી આર્યનને ફોન કરી કહે છે કે, ‘ભરત કાકા મોદી બોલું છું, તું ગેટ આગળ આવ તારું કામ છે’એટલે આર્યન ગેટ આગળ જાય છે અને ત્યાર બાદ આ વિપુલ આર્યન મોદીને કારમાં બેસાડીને ચર્ચા કરે છે અને પૂછે છે કે બોલ તારે જગાણાની આ છોકરી સાથે શું છે? પ્રેમ સબંધ છે કે કેમ સાચું બોલ એમ કરીને એને ખખડાવે છે અને ચર્ચા વધુ ઉગ્ર બનતા તેની જ કોલેજમાં ભણતા એના એક મિત્રને ફોન કરીને બોલાવે છે. જેથી તેનો મિત્ર આ કાર આગળ પહોંચતા વિપુલ અને આર્યન કારમાંથી નીચે ઉતરે છે અને ઉગ્ર ચર્ચા બનતા કારમાં બેસીને ચર્ચા કરીએ એમ કહે છે.

‘એક બાદ એક શખ્સોને ફોન કરી બોલાવ્યા, આર્યનનો ફોન ચેક કર્યો ’
તાલુકા PI આગળ કહે છે કે, ત્યાર બાદ આર્યન અને તેના એક મિત્રને ગાડીમાં બેસાડીદે છે અને કાર ત્યાંથી ડ્રાઇવ કરીને આગળ લઈ જાય છે. આ દરિમયાન ગાડી ચલાવતા ચલાવતા બધાને ફોન કરવાનું ચાલુ કરે છે. સૌથી પહેલા વિપુલ જગાણાના રહેવાસી એવા ભાવેશ ચૌધરીને ફોન કરે છે. તેની સાથે વડગામ પાસેના એદ્રના ગામનો સરદાર ચૌધરી પણ તેની જોડે હતો. સાથે જ પાલનપુરના પુષ્પલ ગામના રહેવાસી એવા કલ્પેશને પણ ફોન કરે છે અને બન્નેને તેમની કાર લઈને જગાણા પાટીયાએ આવવા માટે કહે છે.તમામ આરોપી જગાણા પાટીયાએ ભેગા થાય છે અને આ તમામ લોકો ભેગા મળી આર્યન મોદીનો ફોન ચેક કરે છે. આયર્નના મિત્ર વિરલે તેને બચાવવાની કોશિશ કરતા તેને ધમકી આપે છે કે તારા પણ આવા હાલ થશે તું સાઈડમાં જતો રહે એમ કરીને સાઈડમાં ઉભો રાખે છે.

આ કેસની તપાસ કરી રહેલા PI એ.વી. દેસાઈ.

‘ભાસ્કર ભેમજી ભાઈના ફાર્મ હાઉસમાં લઈ ગયા’
PI એ.વી. દેસાઈએ વધુમાં જણાવ્યું કે, જોકે રોડ પર જગ્યા સેફ ન હોવાથી તેમને આ જગ્યા સેફના લાગતા આ તમામ આરોપી જગાણા પાટીયાથી આર્યનને બાજુમાં આવેલા ગામના જ ભાસ્કર ભેમજી ભાઈના ફાર્મ હાઉસમાં લઈ જાય છે અને આ દરમ્યાન જગાણાથી છોકરીના ભાઈ જગદીશ ચૌધરીને ફોન કરીને બોલાવે છે. ત્યાર બાદ સરદાર ચૌધરી, કલ્પેશ, જગદીશ, વિપુલ, સુરેશ, સરદાર મીર આ તમામ આરોપીઓ ભેગા થઈને આર્યનને મારવાનું શરૂ કરે છે અને ખિલાસળી તેમજ દુધ સાફ કરવાના સળિયાથી બહેરેહમી પૂર્વક માર મારે છે.

‘નાકમાંથી લોહી નીકળતું હતું, નગ્ન વીડિયો ઉતારી ધમકી આપી’
આરોપીઓએ કેવી રીતે ન્યૂડ કરી વીડિયો ઉતાર્યો તે અંગે PI એ.વી. દેસાઈએ કહ્યું કે, 6થી 7 લોકોએ ઢોર માર માર્યા બાદ આરોપીઓ આર્યનને નજીકમાં આવેલી ઓરડીમાં લઈ જઈ તેને નગ્ન કરી તેનો વિડીયો ઉતારે છે અને તેને કહે છે કે બોલ ભૂલ થઈ ગઈ હવે વાત નહીં કરું અને તેને ધમકી આપે છે કે જો આ વાત કોઈને કહીશ તો તારો વીડિયો અમે વાઇરલ કરી દઈશું. નાકમાંથી લોહી નીકળતું હોવાથી તેનું નાક ધોવડાવે છે અને પછી તેને આદર્શ કોલેજ સુધી મૂકતા આવે છે.

આર્યનના ન્યાય માટે મેદાને પડેલી તેની બહેન અને અન્ય મહિલાઓ.

અર્બુદા સેનાના પ્રમુખે અન્ય શખ્સો સાથે મળી આ રીતે ષડયંત્ર રચ્યું
આર્યનની હત્યાનું કઈ રીતે આખું પ્લાનિંગ કર્યું તે અંગે PI એ.વી. દેસાઈએ જણાવ્યું કે, આ આખું પ્લાનિંગ 14 ફેબ્રુઆરી આસપાસ કરવામાં આવ્યું હતું. પાલનપુર અર્બુદા સેનાના પ્રમુખ જયેશ ચૌધરી પાસે આ જગાણા ગામની યુવતી સાથે કોઈ અન્ય સમાજના યુવકનો પ્રેમ સંબંધ છે તેવી માહિતી હતી. જેથી જયેશ ચૌધરીએ આ સમગ્ર બાબતની જાણ અર્બુદા સેનાના લોકોને કરી અને આ બાબતે ચર્ચા કરવા માટે જગાણા ગામ પાસે આવેલી ક્રિષ્ના હોટલમાં આ સંગઠનના લોકો ભેગા થયા અને આ છોકરાને પાઠ ભણાવવાનું નક્કી કર્યું. આ કામ અર્બુદા સેના સાથે જોડાયેલા વિપુલ ચૌધરીને સોંપ્યું. જેમાં વિપુલને આર્યન મોદીને લઈ આવવા નક્કી કર્યું. આ મિટિંગમાં જ આર્યનના અપહરણનું આખું પ્લાનિંગ થયું.

શું આર્યન મોદી અને છોકરી વચ્ચે પ્રેમ સંબંધો હતા?.
આર્યન મોદી અને છોકરી વચ્ચે કોઈ પ્રેમ સંબંધ હતા કે નહીં તે અંગે PI દેસાઈએ કહ્યું કે, આર્યન જે કોલેજમાં ભણતો એ કોલેજમાં 13 છોકરાઓ અને 70 છોકરીઓ છે અને આર્યન હોંશિયાર હતો એટલે કોલેજના છોકરા અને છોકરીઓ આર્યનને અભ્યાસના અસાઇનમેન્ટ બાબતે પૂછતા હતા. જગાણા ગામની છોકરી એ આર્યન સાથે અસાઇનમેન્ટ બાબતે કોલેજમાં કઈ વાત કરી હતી તે દરમિયાન આ પિયુષ નામનો વ્યક્તિ જોઈ જતા તેણે આર્યન અને આ છોકરી વચ્ચે પ્રેમ સંબંધ હોવાનું જયેશને કહ્યું હતું. પોલીસે આર્યનના મોબાઈલ ફોનની તપાસ કરતા તેમાં એવી કોઈ જ પ્રેમ સંબંધ બાબતે વાતચીત કે પછી બોગસ વાતચીત મળી આવી નથી. આ સમગ્ર ઘટનામાં વધુ આરોપીઓ છે કે કેમ તેની અમે તપાસ કરી રહ્યા છીએ.

આર્યનને ન્યાય અપાવવા માટે 19 ફેબ્રુઆરીએ કેન્ડલ માર્ચ યોજાઈ હતી.

રાજસ્થાન, મહારાષ્ટ્ર, મધ્યપ્રદેશમાં રેડ કરી આ રીતે આરોપીઓને પકડ્યા
PI દેસાઈએ વધુમાં ઉમેર્યું કે, આરોપીઓએ તેમના ફોન સ્વીચ ઓફ કરી દીધા હતા. પરંતુ સમગ્ર ઘટનાને નજરે જોનારા આર્યનના મિત્ર સહિત 6 પ્રત્યક્ષદર્શીઓના પોલીસે નિવેદન નોંધ્યા હતા. આ સાક્ષીઓએ બાતવેલી જગ્યાના પોલીસે સીસીટીવી મેળવ્યા અને તેના પરથી આરોપીઓની ઓળખ કરી તેમના નામ સરનામા એકત્ર કર્યા. આરોપીઓને પકડવા માટે પોલીસે કુલ 6 જેટલી ટીમો બનાવી હતી અને ગુજરાત સહિત મહારાષ્ટ્ર, રાજસ્થાન અને મધ્યપ્રદેશના 12 જિલ્લાના 250થી વધારે સ્થળે દરોડા પાડ્યા હતા અને ટેક્નિકલ સર્વેલન્સ તેમજ CCTV અને આરોપીના ફોન રેકોર્ડિંગ આધારે 13 આરોપીને પકડી પાડ્યા હતા.

‘બીજી વખત રિંગ કરી તો આર્યનનો ફોન સ્વીચ ઓફ થઈ ગયો’
જ્યારે આર્યન મોદીના પિતા ભરતભાઈએ દિવ્ય ભાસ્કરની ટીમને જણાવ્યું કે, ગુરુવારે મેં એને કોલેજમાં ફી ભરવા માટે પૈસા સ્કૂલ બેગમાં મૂક્યા હતા. બપોરે લગભગ 12:30 વાગ્યે મેં એને ફોન કર્યો અને પૂછ્યું કે ફી લઈ ગયો? એણે હા પાડી પણ પાવતી લીધી તો તેણેને કહ્યું કે ના પાવતી આપી નથી. આ દરમિયાન એણે કહ્યું કે કોઈનો ફોન આવ્યો હતો અને ભરતભાઈ બહાર બોલાવે છે એમ કહ્યું. કદાચ કોઈ ઓળખીતા હશે. જેથી તેમણે મળીને આવું અને પછી ફોન કરું એવી વાત કરી અને હું લગ્નમાં જમવા ગયો. આમ તો દરરોજ બે વાગ્યાની આસપાસ એ પાછો આવી જાય છે. પરંતુ એ આવ્યો નહીં એટલે બપોરે અમે એને ફોન કર્યો તો એના અવાજમાં થોડો એ ગભરાયેલો હોય એવી હાલતમાં એને કહ્યું કે આવીને વાત કરું, મને એવું લાગે છે કે એ વખતે એને મારવાનું કામ ચાલી રહ્યું હશે, જ્યારે બીજી વખત કોલ કર્યો તો એને ઉપાડ્યો અને કહ્યું કે હું આવી જઈશ. એટલે અમે કહ્યું કે ઘરને તાળું મારી દીધું છે તું આવીને અહીં ચાવી પડી છે લઈને ખોલી દેજે. અમે જ્યારે સાંજે 4:30 વાગે પરત આવ્યા ત્યારે તાળું મારેલું હતું. જેથી આર્યનની મમ્મી એ ફરી ફોન કર્યો પણ એણે ઉપાડ્યો નહીં. બીજી વખત રિંગ કરી તો ફોન સ્વીચ ઓફ થઈ ગયો. પછી મેં ફોન કર્યો તો ફોન ઉપાડ્યો એ ગભરાયેલો હતો અને હું આવું છું.

પોલીસે પકડેલા આરોપીઓ.

આ છે આર્યનને મોતને ઘાટ ઉતારનાર આરોપીઓ